Wednesday, February 21, 2018

Ээж байхын үнэ цэнэ 1

Зиа, энэ блог ч шороо тоос, цас мөсөнд хучидаад удаж дээ. Ээж болохоор их сайхан байдаг гэж хүн бүр ойлгодог байх. Гэхдээ хүмүүсийн хэлээд байдаггүй олон зүйлсийг мэдэрч байгаагаа бичиж сийрүүлмээр санагдлаа. 1. Төрсний дараах сэтгэл гутрал гэдэг тоглоом биш. Эрчүүд бүр ч ойлгодоггүй энэ үзэгдэл нь янз бүрийн гормон, сэтгэл санааны өөрчлөлтөөс болж, миний хүслээс гадуур намайг арслан бар, аашны тулам, байж болох муу бүхний ёроолд очсон мэт болгоно, тэгэж санагдуулна. Өглөө гэрийнхэн гараад явнаа. Ядахад олуулаа. Угаалтуур дүүрэн аяга таваг, үүдээр дүүрэн шороо, шавхай, угаалгын машин дүүрэн хиртэй хувцастай хүүгээ тэврээд үлдэнэ дээ. Орой хүмүүс цугларахад гэрээ цэмцийлгээд, хоолоо бэлдээд байж байх хэрэгтэй. Цэвэрлэлээ гээд хэн ч магтахгүй, цэвэрлэхгүй гээд надаас өөр хэн ч бухимдахгүй, нэг тийм нэргүй албат, хөлсгүй зарц ч юм шиг. Хүүгээ хөхүүлээд, угааж арчаад, гэрээ гялалзтал цэвэрлээд, охин цэцэрлэгээс өвчний чөлөөтэй үед нь эм танг нь цагаар нь уулгаад, үс гэзгий нь сүлжээд, өөрийгөө цэмбийлгээд суух үе байнаа байна. Бас алийг нь ч хиймээргүй санагдаад, өөртөө гутраад, шалны алчуур, хэнд ч хэрэггүй, 1000 төгрөгийн дэвсгэртээс үнэгүй болсон мэт санагдан уйлах, уурлах, багтрах үе ч байна. Энэ багтраагаа гэрийн ажлаа хийж байж л гаргана. Гаргаж амжаагүй байхад нөхөр харьж ирвэл манжийн үеийн 9 эрүүнд орсон мэт, хөлийн эрхий хуруун дээрээ алхах нь холгүй болтол мэрнэ дээ. 2. Нийгэмших хэрэгцээ гэж бас нэгэн зүйл. Гэртээ байгаа ээжүүдэд гэрээсээ гадуур найз нөхөдтэйгээ уулзах, ах дүүгийндээ зочлох зэргээр нийгэмших хэрэгцээ асар өндөр байнаа. Найзууд надад хэлэлгүй сэм уулзах, дотны нөхөд нь огт хэлэлгүйгээр гадаад явах, эсвэл хэлж байгаад удаан хугацаагаар хол явах зэрэг нь сэтгэл зүйд асар хүндээр тусах жишээтэй. Тэртэй тэргүй ирэхгүй юм чинь гэж өөрсдөө хүний өмнөөс шийдвэр гаргах биш, өөрөө юу гэж шийдэхийг нь сонсох хэрэгтэй. Гадаад явах гэж байгаа бол гэртээ суугаа хүнийг гэгэлзүүлээд яахав гэж бодохын оронд найз нь явлаа, дараа хамт явна шүү гэж хэлж урамшуулах хэрэгтэй. Өөрөө ийм зүйлийг тоодоггүй, их л харц дээгүүр сээхэлзсэн хүн байсан болохоор ..... хэлэх ч үг алга даа! 3. Ганцаараа, нэгээрээ, одиноороо, Түмээтэй л хамт байх хэрэгцээ. Үргэлж хүүхдээр амьдрал маань дүүрч, хүүхдээрээ баян, өөрөөрөө ядуу нэгэн болчихсон ч юм шиг. 7 хоногт ядаж 1 удаа гэрээсээ гараад 1 цаг гадуур алхаад, кофе уугаад, номын дэлгүүрээр эргэлдмээр болох юмаа. Эсвэл зүгээр л бодол болоод суух ч сайхан. Бусад төрөлтнүүдэд өөрийгөө богтлуулан амьдардаг ээжүүдийн нинжин сэтгэл, яруу алдар бадартугай. Би ч болоогүй байна даа....

Sunday, October 27, 2013

Эргэн дурсахуй

Блог бичилгүй их удсан байна. Нэг л мэдэхэд цаг хугацаа харвасан сум шиг л нисээд өнгөрөх юм даа. Саарал хот маань нэг иймэрхүү. 2 жилийн өмнө авсан зурагнууд. Ямар сэтгэгдэл төрж байна да? Хотын саарал гудамжны, нэг ийм байшинд олон ч дурсамж үлдэж дээ!

Sunday, April 24, 2011

2011 оны 3, 4-р сар сонирхолтой, идэвхитэй сар

Заа, энэ бүхэн Үтрээний хүүрнэл гэдэг жүжгээр эхэлсэн юмдаг. Жүжиг үнэхээр сонирхолтой. Эрэгтэй ч бай, эмэгтэй ч бай, хүмүүс ер нь үзэж, бусдын түүхийг сонсох хэрэгтэй л дээ. Эмэгтэй хүнийхээ хувьд өөрийгөө эмэгтэй хүн гэдгийг, үтрээ гэдэг эрхтэн намайг хэн гэдгийг тодорхойлж, мэдрэмж, таашаал, амь амьралын эх үүсвэр болж байдгийг ойлгуулав.
Дараа нь Нойрсож Буй Гүнж балет. Гайхалтай сайхан тоглолт болсон. Гүнжид тоглосон балетчин Батчимэг маш уян, гайхалтай сайн тоглосон. Урьд нь үзэж байгаагүй л дээ. Гэхдээ бид нар Уолт Диснейн хүүхэлтэй киноны зохиолд нь илүү автчихаад, багадаа уншиж байсан үлгэрээ мартчихсан байж гэж бодогдсон. Чайковскийн хөгжим угаасаа агуу. Чайковскийн 3 балетын аудио CD байдаг болохоор хөгжим нь танил байсан. Аан тийм, Дуурийн театрын нэг монгол царайтай залуу байнаа. Мөнгөнхөлөг гэдэг. Энэ удаад Хорон санаат шулмын дүрд тоглосон. Балетчингаасаа илүү, Сайн жүжигчин санагдсан.
Дараа нь Бахчисарайн оргилолт булаг балет. Хөгжим нь нэг л өөр, оргилуун, сонирхолтой санагдсан.. Батчимэг бас л үнэхээр гайхалтай тоглосон.
Тунгалаг Тамир мюзикл - Уаааа, дамшиг гээд л явж өгсөн дөө. Хөгжим нь үнэнийг хэлэхэд нэг их таалагдаагүй. Мундаг хөгжмийн зохиолчийг шүүмжлэх нь ч хаашаа юм. Угаасаа зохиол нь ч, кино нь ч сэтгэл хоногшсон агуу бүтээлүүд болохоор хөгжмийн хэлээр хүнд аль хэдийн бий болчихсон сэтгэгдлийг хөндөнө гэдэг хэцүү байсан биз.
Бичээд байсан чинь барагддаггүй э. Дундуур нь Морин хуурын чуулгы Кармен Сүит, Баянмонгол чуулгын Соло Найт тоглолтуудыг үзсэн. Хамгийн сүүлд Хунт Нуур үзлээ. Урьд нь хунт нуурыг 2 удаа л үзсэн санагдаж байна. Тэгэхэд дандаа Цагаан Хун, Хар Хунд 2 өөр балетчин тоглодог байсан бол энэ удаад балетчин Саруул хоёуланд нь гайхалтай сайхан тоглосон. Хар хунгийн бүжиглэдэг хэсгийг үнэхээр гайхалтай амилуулж, сэтгэл хөвөлзтөл бүжлээ дээ. 4 сар дуусахаас өмнө амжвал Аида дуурийн нээлтийг үзэх санаа байна. Нэг мэдсэн чинь гэрээс гарахгүй байж байж ямар их юм бөөндөөж үзчихсэн хүн бэээ???? ккк. Гэхдээ завгүй амьдралын хэмнэл маш их таалагдаж байгаа. :)

Saturday, July 3, 2010

Хугасхан жаргал...

Аз жаргал гэж юу вэ? Утга учиргүй амьдралаас утга учир хайсан үзүүр, төгсгөлгүй эрэл юмуу? Энгүүн тааваараа байж, үнэн өөрөө над дээр ирэхийг хүлээх эцэс үгүй хүлээлт юмуу? Хумсхан жаргал эдлэхийн төлөө эцэж цуцахгүй хөдөлмөрлөх юмуу? ядарч унатлаа ажиллачихаад, залхуу нэгнээ муучлан гадуурхах юмуу? Зүгээр л өдөр болгон өөрт ирсэн аливаа үйл явдалд хариу үйлдэл үзүүлээд суух юмуу? өөрөө ямар нэг зүйлийг эрж хайж, адал явдыг бий болгох юмуу?
Эцсийн дүнд хүний хэрхэн амьдарч, хэнд ямар үйл хийснийг хэн шүүх юм бэ? Карма? үйлийн үр шийднэ гээд л амьдраад байх уу?
Зүгээр л амьдармаар, жаргамаар байна. Болзоонд гоёж очиж, бороонд норж, шөнөжин гудамжаар алхаж, зөөлөн салхи, сар хоёр юу гэж шивнэхийг сонсож, модод салхинд найгахдаа биесээ хэрхэн тэврэхийж ажиж, бүх л хорвоо тэр чигээрээ анир чимээгүй болохыг мэдэрч, цаг хугацаа, орон зайг умартан, бүх л бие сэтгэлээрээ аз жаргалыг амтлахыг хүснэ.
Дэндүү адгуу ч гэмээр хүслийг аз жаргалын эрэл гэж ойлгож болох уу? Аз жаргалыг сэтгэл, хүслээрээ мэдэрдэг үү? оюун ухаан, ухамсраараа мэдэрдэг үү?
Жижигхэн биенд маань хэт ихэдсэн олон асуултаас өөрийгөө чөлөөлж, зүгээр л цаг хугацаа, хором бүрийг аз жаргалтай өнгөрөөхийг хүснэ. Гэхдээ ...

Thursday, June 17, 2010

Амьдралаа гэж...

Дэндүү олон үйл явдал, адармаа ихтэй энэ амьдрал гэдэг нээрээ л утга учир нь олдохгүй юмаа.
Саяхан ингэж бодлоо. Хүн үнэхээр амьдралд сонголт хийдэг үү, эсвэл хэдийгээр хүн сонгосон гэж боддог боловч тухайн үйлдлийг хийх гарцаагүй байдаг уу?
Хэдэн жилийн өмнө найзтайгаа энэ тухай ярилцаж байсан санагдана. Амьдрал, аливаа зүйлс бүгд хоорондоо харилцан хамааралтай, бүр дэндүү их хамааралтай учир бүх нөхцлийг тооцоолсон бол тухайн зүйл яг тийм байх нь гарцаагүй гэсэн утгатай. Навчаар жишээ авсан санагдаж байна. Тухайн үед би өөрөө мань хүнтэй эсрэг байр суурьтайгаар, өөрөөр хэлбэл, хүн ухамсартайгаар сонголт хийдэг, тиймээс ухамсаргүй навчтай зүйрлэх боломжгүй гэж хэлж байсан юм. Гэтэл саяхан өөрөө яг найзынхаа хэлсэн зүйлийг бодоод сууж байлаа. Хүн нээрээ сонин амьтан юмаа.
Гэснээс сүүлийн үед уран зохиолын ном их уншиж байгаа юм байна. Гёте их сонин нөхөр байнаа. Заавал тухтайхан сууж байгаад ойлгож уншихгүй бол, тэр нөхөр ямар их юм боддог байсийм дээ. Хүмүүсийн хоорондын харилцаа, амьдрал, хайр сэтгэл, нийгмийн ялгаа, тэр их юмыг дандаа бодсоор байгаад тархи нь задарчихаагүй нь аз. Би зүгээр л номыг нь унших гээд бодлыг нь гүйцэхгүй юм. ...

Wednesday, February 17, 2010

Goodreads


quality="high" wmode="transparent"
FlashVars="id=2555149&shelf=read&title=Tumeeb13's bookshelf: read&host=www.goodreads.com&sort=date_added&order=d¶ms=amazon,,dest_site,">



Tumeeb13's bookshelf: read


Аянгат цагийн туужThe AlchemistSouth of the Border, West of the Sun: A NovelThe Teaching of BuddhaТөсөөллийн ӨрөөндХүүрнэл зохиолын товчоон

More of Tumeeb13's books »



Tumeeb13's  book recommendations, reviews, favorite quotes, book clubs, book trivia, book lists

Thursday, January 14, 2010

Зүүд...

Аюурзана, Өлзийтөгс хоёрын номнуудыг дарааллуулаад уншсан биш зүүдчин болох нээ. Гэхдээ зүүдээ манах сайхан л даа.
Хэд хоногийн өмнө их сонин зүүд зүүдэллээ. Би хүүхэд төрүүлээд. Тэр нь хүү л бололтой юм. Хүнд мэдэгдэхээргүй жижиг гэдэстэй байхад минь төрсөн хүүг маань аав огт мэдээгүй болохоор ээж бид хоёр хүүгээ хөхүүлэх гэж бөөн сандралдаан болох юм. Ааваас нуугаад байгаа болтоймаа. Ааваас миний хүүхдийг нуугаад, хувцасны шүүгээнд хийсэн байвал яахуу? Жижигхээн амьтан шүүгээнээс гаргаж ирээд хүүгээ хөхүүл гэхээр нь би бүр сандраад, юу яриад байгаан бээ, юун хүүхэд гэж асуух юм. Ой санамжаа хэсэг хугацаанд алдсан болтой. Ээж яаж төрснийг минь ярьж өгөхөөр нь гэнэт санаад, хүүхдээ тэвэрч аваад л. Тэгснээ сэрээд, миний хүү гэж хашгирахаа шахсан. Зүүд байсан гэдэгт итгэж чадахгүй хэсэг алмайрсан.
Сонин сонин юм их зүүдэлдэг хүн шүү.
Нээрээ мөнгөн зүүлтээр хэдэн хүүхэдтэй болохыг нь мэргэлдэг юм байна. Намайг тэгтэл 2 охин 1 хүүтэй болно гэсэн. Харж л байя.